Skemmtilegar myndir af Tweed hjólreiðum 2012

Þetta er skemmtileg keppni sem verðugt er að skoða á næsta ári.
Hér er hlekkur á myndasafnið.

Grip Grap Nordic Hankskar - 01073

Til sölu hjá Heino Cykler

Er búinn að vera kalt á höndunum síðustu daga og keypti mér þessa hanska úti í Danmörku í vikunni. Núna er bara að prófa þetta.

Cintamani Ullarnærfatnaður

Til sölu á Cintamani.is

Til sölu á Cintamani.is

Það er skilyrði fyrir allri útiveru að vera í ullarnærfatnaði. Sjálfur á ég sett frá Cintamani sem ég mjög ánægður með. Þó er eitt með nær allan Cintamani fatnað sem ég á að mér finnst fatnaðurinn hnökkri meira en mér finnst eðlilegt. Ég hjóla nær allan veturinn í þessari setti og búinn að nota það, núna í 3 vetra og það sést ekki á þeim. Fyrir utan rennilásagöt sem hafa komið í klofið á buxunum (myndast þegar rennilás á utanyfirbuxum rennst í efnið). Það sem ég held einna mest upp á þessar flíkur er að þær halda forminu mjög vel og þær teygjast ekki líkt og fyrri fatnaður sem ég átti. Þannig að það er auðvelt að vera í öðru utanyfir. Einnig má nefna að þær draga ekki í sig ólykt sem festist. Fyrri ullarnærfatnaður (man ekki hverjar gerðar) lyktaði óskaplega (svipað og með gömlu Thermal fatnaðinn) og var nær ónothæfur eftir einn dag eða svo. Ég hefði viljað að ermarnar á bolnum væri aðeins lengri og þá með gati fyrir þumalinn, líkt og er á Cintamani Frosta jakkanum, þá dregst nokkuð hvað maður þarf að fara í vettlinga og samskeytin vettlingar bolur verða betri (gapir minna). Loks eru ekki óþarfa saumar sem margir aðrir framleiðendur eru að pota á flíkurnar sínar (Janus og Devold til dæmis gera), þannig að það er minna um pirring. Eftir þvott eru flíkurnar aðeins þrengri en eftir notkun (eins og vera ber) án þess að vera þrengjandi.

Mæli eindregið með þessum flíkum

Vetrarfatnaður Daníels

Bætti við síðu þar sem ég tel upp þann fatnað sem ég er í þegar ég hjóla á veturna. Þetta er allur fatnaðurinn, engu sleppt. Þetta er sá fatnaður sem ég hjóla í, í og úr vinnu. Ég hef aðstöðu til þess að skipta um föt og fara í sturtu. Þessi samsetning dugar í flest veður og ég hef hjólað í þessari samsetningu niður í -15°C. Þegar það er aðeins heitara þá sleppi ég oftast flíspeysunni og/eða síðu nærbuxunum.

Endura Deluga Gloves - E0039

Til sölu á Chain Reaction Cycles
Til sölu hjá Erninum

Fljótlega eftir að ég keypti hjólið mitt uppfærði ég gömlu TNF flíshanska mína í ódýra vetra hjólahanska. Þeir hanskar gerðu sitt gagn, en voru ekki nægilega hlýjir þegar áreyndi og voru nokkuð víðir. Viðmiðið sem ég set varðandi heita hanska er hvort mér verði kalt á baugfingri og litlafingri. Það eru einmitt þeir fingur sem taka oftast mestan vindinn á sig og eru mest stöðugir. Þess vegna getur verið betra að vera í vettlingum þar sem hitinn dreifist betur um hendurnar og fingurnir hita hvorn annan. En á móti kemur að erfiðara er að skipta um gíra og stjórna bremsum.

Í fyrra keypti ég svo þess hanska frá Endura (þeir sem hafa ekki tekið eftir því, þá er ég mjög hrifinn af því merki). Þeir eru nokkuð þröngir og það getur verið erfitt að fara í þá vegna þessa. En það er einmitt það sem ég sækist eftir - aðsniðnum heitum hönskum. Þeir eru ágætlega fóðraðir og hef ég ekki orðið kalt í þeim þótt frostið fari niður i -10°C. Hef upplifan smá kulda í verstu veðrunum (snjókomu og vindi). Þeir eru góðum þykkingum í lófa, sem er af hinu góða fyrir þá sem vilja hafa handföng á stýrinu sem eru þunn. Endurskin á hönskunum nýtist ágætlega þegar gefið er merki um að hjólamaðurinn vill beygja í myrkri. Svo er horþurrka á vísifingri, ég hefði viljað hafa hana líka á þumlinum (fyrri reynsla segir mér að það er þægilegra). Loks er teygjuefni við hanskaopið sem fer ansi ofarlega upp á framhandlegginn. Þetta minnkar líkurnar á beru skinni á milli jakka og hanska.

Gallarnir við þessa hanska eru ekki miklir. Þó ber að skoða þá vel áður en rétta eintakið er valið. Gallinn er sá sami og nær með allar Endura vörurnar, kannski vegna þess að þær eru oftast á góðu verði (að mér finnst). Gallinn er sá að saumar eru oft nokkuð tæpir þannig að þeir vilja rakna aðeins upp. Í mínu tilviki eru saumarnir í kringum hanskaopið á teygjanlega efninu að trosna, kannski er það vegna þess hversu aðsniðnir þeir eru að það togast á þeim þegar farið er í vettlingana.

Ég mæli eindregið með þessum hönskum. Eftir nokkurra leit ákvað ég að kaupa þessa hanska. En og aftur kemur þó upp sú staða að vöruúrvalið á Íslandi er ekki mikið í þessum efnum, þannig að það stýri kannski valinu. Það eru nokkrir hlutir sem maður kaupir ekki blindaður í gegnum netið án þess að prófa.

Endura FS260-Pro Skullcap - E0029

Til sölu á Chain Reaction Cycles

Fyrir þá sem hjóla með hjálm (það eiga allir að gera) og það að vetrarlagi þá verður oft erfitt að finna sér höfuðfat sem heldur á höfðina hita þegar hitastigið er lágt og er nægilega þunnt til þess að hjámurinn standi ekki upp eins og hjólamaðurinn væri lífvörður hennar hátignar í Bretlandi. Endura gerir nokkur höfuðföt sem sinna þessu ágætlega. Fram að að því að ég keypti þessa húfu, notaði ég flíshúfu eða buff. Bæði að mínu mati nær fullkomlega ónothæft. Flíshúfan var of þykk og gerði hjálminn líklegast ónothæfan í falli þar sem hjálmurinn var nokkuð laus á höfðinu. Buffið dróg svitann í sig og mér varð kaldara ef eitthvað var og lágt einkennilega undir hjálmnum.

Þessa húfu fékk ég í jólagjöf. Hún er afar teygjanleg þótt hún mætti fara aðeins neðar svo myndi hylja eyrun aðeins betur, þá aðallega eyrnasnepplana. Hún nær vel niður á ennið og niður á hnakkann. Ég myndi þó mæla með einhverju í hálsinn ef þess ber undir til þess að hylja efsta hlutann á hálsinum, fyrir neðan húfuna við hnakkann (til dæmis buffi). Hún er þunn og margir myndu telja of þunn. Staðreyndin er sú að þeir sem eru óvanir að hjóla í kulda, klæða sig í fyrstu oft of mikið. Fólk hitnar við hjólreiðarnar og það er vanalega vandamálið með kula á líkamnum þegar stoppað er ekki þegar hjólað er. Þessi húfa hefur reynst mér vel. Það eru þykkingar þar sem mesti kuldinn næður á. Hún er þunn yfir hárið þannig að hún andar eilítið. Jafnframt þornar hún á skammri stundu. Saumarnir pirra mann ekki og hún heldur hjálminum stöðugum. Ég hef ekki pirrast við það að hjóla með þessa húfu og hjálm og verið með iPod í eyrunum (vel að merkja það er ekki æskilegt að hlusta á tónlist og hjóla).

Cintamani Frosti Primaloft úlpa

Til sölu á Cintamani.is

Fékk svona Frosta í afmælisgjöf frá konunni og tengdafjölskyldu. Þetta er kannski ekki tengt hjólum. En þetta er alveg afbragðs úlpa. Ekki of heit og maður er ekki eins og Michelin maðurinn í henni. Gott til þess að kasta yfir sig eftir erfiðan hjólatúr, eða við áningar svo maður kólni ekki strax. Tvennt sem varð til þess að ég átti erfitt með að velja þessa úlpu var að rennilásinn kemur upp á hlið hökunnar ekki framan á. Seinna atriðið var að ég hefði vilja fá hana í öðrum lit. Íslendingar eru sjúkur í allt sem er svart og það selst næstum því ekkert útivistartengt á Íslandi nema það sé svart. Stroffin við hendurnar nær langt fram og er með gati fyrir þumalputtana. Stroffið byrjar innarlega í úlpunni þannig að langir vettlingar eða hanskar komast auðveldlega fyrir. Ég vildi ekki dúnúlpu og þetta er sú úlpa sem er að mínu mati á viðráðanlegasta verðinu. 66° Norður gera sambærilega úlpu sem er um 50% dýrari - er ekki að skilja verðlagninguna hjá þeim.

Endura Luminite Overshoes - E0036

Til sölu á Chain Reaction Cycles

Mér hefur fundist val á búnaði í innkaupum verslanna á Íslandi oft á tíðum vera einstaklega einkennilegt. Það virðist sem verslanir, stundum, kaupi magn vara sem teljast Entry-Level vörur og svo kaupa þær afar lítið magn vara sem teljast High-End. Mid-Range vörurnar rata oft ekki í verslanir. Þar er Örninn engin undantekning. Geitur eða skóhlífar sem eru í boði á Íslandi (það er ekki boðið upp á stórt vörurúrval þar) eru flestar í Neoprene. Þær hlífar halda að fótunum hita og verja ágætlega föturna frá vatni og snjó en eru afar stífar. Sökum þess hve stífar þær eru, þá hef ég verið að heyra að rennilásarnir sem eru á þeim gefi sig, oft eftir litla notkun. Rennilásar eru algengir í Neoprene geitum.

Ég ákvað að kaupa mér geitur frá Endura (merki sem Örninn selur), en pantaði mér geitur sem hafa meira endurskin en þær geitur sem eru í boði á Íslandi. Þær eru mýkri en Neoprene geitur og teygjast aðeins meira og þær festast með frönskum rennilás.

Sem stendur er ekki komin reynsla á þessar geitur, en ég mun uppfæra eða leggja nýjan póst þegar að því kemur. Við fyrstu sín er ég mjög ánægður með þessar geitur. Þó, líkt og með buxurnar þá eru stærðirnar frá Endura alveg sé á báti og lítið hægt að fara eftir þeim. Ég fór eftir ummælum þeirra sem hafa keypt geitur frá Endura og keypti einu númeri stærra en töflurnar frá Endura bentu mér á að gera. Og þær smell passa.

Endura Men's Hummvee 3/4 with Liner - E8024

Til sölu á Chain Reaction Cycles

Fyrir sumarið keypti ég Endura Hummvee 3/4 stuttbuxur (hnébuxur). Eftir nokkura leit á Íslandi án þess að finna buxur sem mér fannst henta mér, lét ég slag standa og pantaði þessar frá Chain Reaction Cycles. Þetta eru einu bestu kaup sem ég hef gert í langan tíma. Eða síðan ég keypti mér kamel drykkjarpoka í bakpokann (fyrir um 3 árum síðan). Þær eru með stillingu nest á skálmunum svo hægt er að þrengja opið. Það er opið efni við hnéspætur til öndunar. Öndunarrennilásar eru hliðunum við mjaðmir (pláss fyrir vasahníf, ef því er að skipta). Styrkingar á rassi. Ágætis fjöldi vasa. Og svo má lengi telja. En stærsti kosturinn er verðið, þar sem innri buxur fylgja. Þessar innri buxur eru dæmigerðar hjólabuxur, þröngar og með bleyju. Þótt Endura segi að hægt sé að nota þær einar og sér, þá tel ég það ekki æskilegt, þrátt fyrir að þær eru nokkuð góðar, þær eru bara heldur grisjóttar fyrir það.

Ég hef verið nokkuð óhræddur að versla vörur af netinu í gegnum tíðina. Þetta var þó í fyrsta skipti sem ég keypti fatnað á netinu. Einu annmarkar sem ég get bent á varðandi þessar buxur, er að stærðirnar frá Endura eru nokkuð kjánalegar. Þó ég færi eftir öllum töflum og mældi mig bak og fyrir þá er stærðin sem hentar mér samkvæmt töflunum kannski aðeins minni er raun bar vitni. Þó hefur ummálið aðeins lagast frá kaupum, þannig að þetta var kannski af hinu góða.

Ég notaði þessar buxur nánast upp á dag í 2 mánuði yfir sumarið og það sést ekki á þeim. Ég bendi þó á að sökum litarins sem ég keypti (Olive) þá draga þær aðeins í sig bletti og drullu. Mjög þægilegar hjólabuxur og útivistarbuxur (þá án bleyju innri buxum).